تازا یئددی کهکشانین تاپیلماسی

ژاپن اؤلکه‌سینده سوبارو تلسکوپون واسطه‌سی ایله یئددی تازا کهکشان کشف اولوندو. نظره گلیر بو کهکشانلار بیردن بیره اوردا ظاهر اولوبلار.

کهکشان سالخیملاری کایناتین اَن جرملی وارلیقلاریندان ساییلیرلار و یوزلر و حتی مینلر کهکشانی اؤزلرینده یئر وئریرلر. بو کهکشانلار جاذبه گوجو ایله بیر- بیرلرینه باغلیدیلار.

نظریه‌لره گؤره دنیا 13.8 میلیارد ایل بوندان اوّل بؤیوک پارتلاما (Big Bang) آدلانان حادثه‌دن سونرا یاراندی. ائله او زمان اولیه اولدوزلار و کهکشانلار فورمالاشدیلار سونرا اونلارین ماوراء بنفش ایشیغی یونیزه اولدو کی بو پروسه‌‌یه کوسمیک تازادان یونیزه اولماق (cosmic reionisation) دئییلیر.

منجّملر، فضایی یونیزه اولماق حادثه‌سینی آراشدیرماق اوچون ایلکین لیمن – آلفا (LAEs)‌ اشعه‌سینی ساچان کهکشانلاری، 13.1 میلیارد ایشیق ایلی فاصله‌ ایله آراشدیرماغا باشلاییبلار.

آراشدیرما تیمی دکتر «ماسامی اوچی»نین باشچیلیغیندا ژاپندا لیمن- آلفا (LAEs) اشعه‌سینه ساچان کهکشانلاری تانیماق اوچون سوبارو تلسکوپوندان استفاده ائله‌ییبلر.

منجملر حیرت ایچینده بو کهکشانلارین 13 میلیارد ایل بوندان قاباقدا ظاهر اولماسینی گؤردولر.

بو آراشدیرمانین یازانلاریندان بیری اولان «آکیرا کونو» تأکید ائله‌دی: بو کهکشانلارین پاریلداماسی بیردن بیره یئددی سککیز یوز ایل بؤیوک پارتلامادان سونرا ظاهر اولدو. بو مسأله فضایی یونیزه اولماغین داها یاخشی درکینه کؤمک ائلیه‌جک.

بو تحقیقین نتیجه‌لری Astrophysical Journal مجله‌سینده منتشر اولوب.

آناکوندانین انسان اودما لحظه‌سی+عکس

دیسکاوری شبکه‌سی 2014-جو ایلینده دسامبرین 7-سینده «دیری اودولماق» آدیندا بیر مستند آنتنه یوللادی. بو شبکه چوخاندان ایدی بو مستند اوچون تبلیغ ائدیردی. قرار ایدی «پل روزالی» بیر آناکوندا ایلانی طرفیندن اودولوسون و بیر ساعت اونون قارنیندا قالسین.

آناکوندا ایلانلاری دنیانین اَن بؤیوک ایلانلاری کیمی تانینیرلار و معمولاً شکارلارینی اودماقدان اوّل بوغارلار.

روزولی‌نین بوغولماماسی اوچون بوتون حاضرلیقلار گؤرولموشدو. متخصصلر اونون اوچون کربن فیبریندن، نفس آلما و ارتباط سیستمینه مجهز اولان مخصوص پالتار حاضرلامیشدیلار کی ایلانین قارنیندا اؤلمه‌سین و ائشیکله دانیشا بیلسین.

روزالی دئییر: بیز بو سیستمین منیم اودولماغیمدان سونرا ایشله‌جگیندن مطمئن دئییلدیک. بونونلا بئله الیمیزدن گلن قدر امین اولماغا چالیشدیق.

او آرتیریر: بیز 60 گون بویوندا آمازونون پرو اؤلکه‌سینده اولان بؤلومونده مناسب آناکوندا آختاردیق. تاپدیغیمیز ایلک آناکوندانین 7.5 متر اوزونلوغو و تقریباً 135 کیلو آغیرلیغی واریدی. آما اونو تله‌یه سالانمادیق. سونرا بیر 6 مترلیک دیشی آناکوندا تاپدیق. ایلان اوّلده منی اودماق ایسته‌مه‌دی و قاچماق نیّتینده ایدی آما اونو تحریک ائله‌یندن سونرا منیم اوستومه یوگوردو و اودماغا چالیشدی.

روزالی‌نین محافظ پالتاری حیوان قانینا بلشیلمیشدی کی آناکوندا اونو یئمگه هوسلنسین.

روزالی، ایلانین گوجلو حلقه‌لری آراسیندا گرفتار اولدو و آز قالیردی قوللاری و سومکلری اوغولسون. اؤزونو ایلانین چنبره‌سینده گرفتار گؤرن روزولی‌نی قورخو بورویور. ایلان اونو اودماق اوچون آغزینی آچیر. آما بو آندا روزولی قورخوسونا مغلوب اولور و اوردان قورتورولماسینی ایستیر.

او، قورتولاندان سونرا اؤزو قورخوسونو توجیه ائله‌مک اوچون دئییر: ایلانین انگی‌نین گوجونو محافظ بؤرکومده حسّ ائله‌دیم و آغزی‌نین سویونون سسینی ائشیتدیم. ائله بیل ایلانین بوتون گوجو، منیم بیر قولوم اوستونده متمرکز اولموشدو. بیر آندا ائله بیلدیم قولوم اوغولور.

هر حالدا دیسکاوری کانالی ادعا ائله‌دیگی مستندی نمایشه قویمادی. بو شبکه بو برنامه‌نین تبلیغینده بیر گون قاباق انسانین بیر ساعت بویوندا ایلانین قارنیندا قالدیغینی و زمان درکی‌نین ایتیدیردیگینی ادعا ائله‌میشدی.

بو برنامه‌دن قاباق و سونرا حیوانلاردان حمایت انجمنی، ایلانی اذیت ائله‌مگه گؤره بو برنامه‌دن انتقاد ائله‌میشدی.